Andhra News: అనకాపల్లి జిల్లా.. జీడిమామిడితోటలో పెద్దపులి!

కోటవురట్లలో పాడి గేదెపై దాడి

కోటవురట్ల, నాతవరం, న్యూస్‌టుడే: అనకాపల్లి జిల్లాలో పెద్దపులి సంచారం కలకలం రేపుతోంది. కోటవురట్ల మండలం టి.జగ్గంపేట సమీపంలోని జీడిమామిడి తోటల్లో పులి పాదముద్రలు కనిపించాయి. కొద్దికాలంగా తూర్పుగోదావరి పరిసరాల్లో సంచరిస్తున్న పులి ఇటు వచ్చి ఉండవచ్చని అధికారులు భావిస్తున్నారు. ఇక్కడి శ్రీరాంపురం సమీపంలోని జీడితోటలో ఓ గేదెను చంపి తిన్నట్లు గుర్తించారు. ఈ విషయాన్ని రైతులు నర్సీపట్నం అటవీ శాఖాధికారులకు చెప్పడంతో డీఎఫ్‌ఓ సూర్యనారాయణ, రేంజర్‌ రాజుబాబు వచ్చి పాదముద్రలను బట్టి అది బెంగాల్‌ టైగర్‌ అని గుర్తించారు. పక్కనే ఉన్న కొండపైకి వెళ్లిపోయిందని, మళ్లీ తిరిగి వచ్చే అవకాశం ఉందని తెలిపారు. చుట్టుపక్కల కెమెరాలను ఏర్పాటు చేశారు. 30 కిలోమీటర్ల పరిధిలో పులి సంచారం ఉంటుందని, అప్రమత్తంగా ఉండాలని స్థానికులకు సూచించారు. పులి గురించి తెలియడంతో పరిసర గ్రామాల ప్రజలు బిక్కుబిక్కుమంటున్నారు.