మరో ఇద్దరు ఇంటర్‌ విద్యార్థుల ఆత్మహత్య

నిజామాబాద్‌ నేరవార్తలు, చాదర్‌ఘాట్‌, న్యూస్‌టుడే: రాష్ట్రంలో మరో ఇద్దరు ఇంటర్‌ విద్యార్థులు బుధవారం బలవన్మరణాలకు పాల్పడ్డారు. నిజామాబాద్‌ జిల్లా కేంద్రానికి చెందిన ఓ విద్యార్థి (17) ఎంపీసీ ప్రథమ సంవత్సరంలో 5 సబ్జెక్టులు తప్పిన భయంతో పెట్రోల్‌ పోసుకొని నిప్పంటించుకొని ఆత్మహత్య చేసుకొన్నాడు. ‘పరీక్షల్లో ఫెయిల్‌ అయిన భయంతోనే ఆత్మహత్య చేసుకొన్నట్లు తమ విచారణలో తేలిందని’ ఎస్సై తెలిపారు. హైదరాబాద్‌ న్యూ మలక్‌పేట ప్రాంతానికి చెందిన విద్యార్థిని (19) ఇంటర్‌లో పాస్‌కాకపోవడంతో తండ్రి మందలించాడు. దీంతో మనస్తాపానికి గురైన బాలిక మంగళవారం రాత్రి తన గదిలో ఉరి వేసుకుని మృతి చెందింది.

బలవన్మరణాలకు పాల్పడొద్దు: సంజయ్‌
గన్‌ఫౌండ్రి, న్యూస్‌టుడే: ఇంటర్మీడియట్‌ పరీక్షల్లో ఉత్తీర్ణులు కాని విద్యార్థులు క్షణికావేశంలో బలవన్మరణాలకు పాల్పడొద్దు, తల్లిదండ్రులకు కడుపుకోత మిగల్చొద్దని భాజపా రాష్ట్ర అధ్యక్షుడు బండి సంజయ్‌ బుధవారం ఒక ప్రకటనలో కోరారు.