Andhra News: తండ్రీకుమారుల దాడి.. వార్డు వాలంటీర్‌ మృతి

తెనాలి: తన దగ్గర తీసుకున్న డబ్బు తిరిగి ఇవ్వమన్నందుకు వార్డు వాలంటీర్‌పై తండ్రీకుమారులు దాడి చేసిన ఘటన గుంటూరు జిల్లా తెనాలిలోని మారిస్‌పేటలో చోటుచేసుకుంది. ఈ దాడిలో వాలంటీర్‌ అక్కడికక్కడే కుప్పకూలి మృతి చెందాడు. స్థానికుల తెలిపిన వివరాల ప్రకారం.. తెనాలి పట్టణంలోని 24వ వార్డుకు వాలంటీర్‌గా పనిచేస్తున్న సందీప్ (22) నుంచి ఓ బాలుడు రెండు నెలల క్రితం రూ.2 వేలు అప్పుగా తీసుకున్నాడు. తమకు డబ్బులు అవసరమయ్యాయని తిరిగి ఇవ్వాలని వాలంటీర్‌ అడగగా బాలుడు దురుసుగా ప్రవర్తించాడు. ఈ క్రమంలో గొడవ జరగడంతో మాటా మాటా పెరిగి ఇరువైపులా దాడి చేసుకున్నారు. 

ఈ క్రమంలో బాలుడు, అతడి తండ్రి వెంకటేశ్వర్లు సందీప్ గుండెపై బలంగా కొట్టడంతో అతడు అక్కడికక్కడే కుప్పకూలాడు. స్థానికులు హుటాహుటిన ఓ ప్రైవేటు ఆస్పత్రికి తరలించినప్పటికీ అప్పటికే సందీప్ మృతి చెందినట్లు వైద్యులు నిర్ధారించారు. మృతదేహాన్ని బంధువులు మారిస్‌పేటలోని తమ ఇంటికి తీసుకెళ్లారు. సందీప్ తండ్రి ఇదివరకే మృతి చెందారని.. తల్లికి మాటలు రావని స్థానికులు తెలిపారు. కుటుంబ పోషణ సందీపే చూసుకుంటున్నాడని.. ఓ పక్క వాలంటీర్‌గా ఉంటూ ఖాళీ సమయాల్లో ఏదో ఒక పని చేసుకుంటూ జీవనం కొనసాగిస్తున్నాడని చెప్పారు.