Health: అధిక రక్తపోటును అదుపులో ఉంచే ఆహారమిదే

ఇంటర్నెట్‌ డెస్క్‌: అధిక రక్తపోటు మందులు వాడితే తగ్గిపోతుందిలే అనుకునే వారు అధికంగా పెరిగిపోయారు. ఉప్పు తగ్గించినా చాలు అనుకుంటారు. సరయిన వ్యాయామం, ఆహార నియమాలు పాటించకపోవడంతో అది తీవ్రరూపం దాల్చుతోంది. కేవలం మందులతోనే కాకుండా చక్కని ఆహారపు అలవాట్లను అలవర్చుకున్నట్లయితే అధిక రక్తపోటు అదుపు పెట్టుకోవచ్చని పోషకాహార నిపుణురాలు అంజలీదేవి సూచిస్తున్నారు.

* ఉప్పును వయసుకు తగినట్టు తినాలి. ఆరోగ్యకరంగా ఉన్నవారు రోజుకు ఐదు గ్రాముల ఉప్పు తీసుకోవచ్చు. మధుమేహం, అధిక రక్తపోటు, వయసు మళ్లిన వారు తక్కువ ఉప్పు వాడాలి. 

* దుంప కూరలు తగ్గించాలి. వీటిలో క్యాలరీలు అధికంగా ఉంటాయి. ఇవి కొవ్వుగా మారుతుంటాయి. 

* మేక, కోడి కూరల్లో ఉండే కొవ్వు నేరుగా గుండె రక్త కణాల్లో పట్టేస్తుంది. నరాల పరిమాణం తగ్గిస్తుంది. దీంతోనే రక్తపోటు వస్తుంది. కొవ్వు పదార్థాలు చాలా తక్కువగా తినాలి.

* 20-30 గ్రాముల నూనె, నెయ్యి, వెన్న మాత్రమే రోజుకు వినియోగించాలి. అంతకంటే ఎక్కువగా తింటే శరీరంలో కొవ్వు పేరుకొని పోతుంది.

* గానుగ పట్టిన నూనెలను తెచ్చుకొని వాడాలి. వాటి ధర అధికంగా ఉండటంతో సహజంగానే వాటిని తక్కువగా వినియోగిస్తాం.అప్పుడు కావాల్సినంత శరీరానికి పడుతుంది.