Air India: గాల్లో ఉండగా ఇంజిన్‌ ఆఫ్‌.. ఎయిరిండియా విమానానికి తప్పిన పెను ప్రమాదం

ముంబయి: ఎయిరిండియా విమానం పెను ప్రమాదం నుంచి బయటపడింది. బయల్దేరిన కాసేపటికే సాంకేతిక సమస్య తలెత్తడంతో మళ్లీ అదే విమానాశ్రయంలో ల్యాండ్‌ అయ్యింది. ముంబయి​ నుంచి బెంగళూరు పయనమైన ఎయిరిండియా A320NEO విమానం.. గాల్లో ఉండగానే ఓ ఇంజిన్ పనిచేయడం ఆగిపోవడంతో అత్యవసరంగా మళ్లీ ముంబయి ఎయిర్‌పోర్టులో దిగింది. టేకాఫ్​ అయిన 27 నిమిషాలకే విమాన ఇంజిన్‌ ఆగిపోయింది. కాగా ప్రయాణికులందరూ క్షేమంగా ఉన్నారని, ల్యాండ్‌ అయిన తర్వాత మరో విమానంలో వారిని తరలించినట్లు సంస్థ ప్రతినిధి వెల్లడించారు.

ఎయిరిండియాకు చెందిన A320NEO విమానాలు సీఎఫ్​ఎమ్​ లీప్ ఇంజిన్లు కలిగి ఉంటాయి. ఆ పీల్‌ ఇంజిన్లలో తలెత్తిన సాంకేతిక సమస్య వల్లే ఈ ఘటన జరిగిందని అధికారులు తెలిపారు. కాగా ఈ ఘటనపై డైరెక్టరేట్ జనరల్ ఆఫ్ సివిల్ ఏవియేషన్ విచారణ జరుపుతోందని సంబంధిత వర్గాలు పేర్కొన్నాయి.