బెంగళూరులో వర్ష బీభత్సం

బెంగళూరు (మల్లేశ్వరం), న్యూస్‌టుడే: భారీ వర్షానికి కర్ణాటక రాజధాని బెంగళూరు చిగురుటాకులా వణికిపోయింది. మంగళవారం సాయంత్రం 6.30 నుంచి రాత్రి 10 గంటల వరకు 114.6 మి.మీ. నమోదైంది. రాత్రి 8.30 నుంచి 10 గంటల మధ్యలోనే 100 మి.మీ. వర్షపాతం నమోదైందని వాతావరణశాఖ అధికారులు ప్రకటించారు. ‘నగరంలో గరిష్ఠంగా 90 మి.మీ. వర్షపాతం నమోదైతే నీరు నిలవకుండా కాలువల ద్వారా వెళుతుంది. అంతకు మించి వర్షం కురిస్తే లోతట్టు ప్రాంతాలు, రహదారులపై నీరు నిలిచిపోతుంది’ అని బెంగళూరు పాలికె ప్రధాన కమిషనరు తుషార్‌ గిరినాథ్‌ పేర్కొన్నారు. మంగళవారం రాత్రి కురిసిన వర్షంతో వాహన సంచారం అస్తవ్యస్తంగా మారిపోయింది. చెట్లు, కొమ్మలు విరిగిపడ్డాయి. విద్యుత్తు సరఫరా నిలిచిపోయింది. విమానాశ్రయానికి వెళ్లే మార్గంలో 4అడుగుల మేర నీరు నిలిచి.. వాహన సంచారానికి ఆటంకం కలిగింది.