Andhra News: తుగ్లక్‌ కూడా నవ్వుకునేలా జగన్‌ పాలన: మాజీ ఎమ్మెల్యే వీరశివారెడ్డి

కమలాపురం: సీఎం జగన్‌ పాలన తుగ్లక్‌ కూడా నవ్వుకునేలా ఉందని వైఎస్‌ఆర్‌ జిల్లా కమలాపురం మాజీ ఎమ్మెల్యే వీరశివారెడ్డి ఎద్దేవా చేశారు. కేసుల నుంచి బయట పడేసేందుకే రాజ్యసభ సీట్లు అమ్ముకున్నారని ఆరోపించారు. కమలాపురంలో నిర్వహించిన మీడియాసమావేశంలో ఆయన మాట్లాడారు. 

నిరంజన్‌రెడ్డి, ఆర్‌.కృష్ణయ్య ఏపీలో ఏ జిల్లాకు చెందిన వారని శివారెడ్డి నిలదీశారు. తెలంగాణకు చెందిన వారికి రెండు రాజ్యసభ సీట్లు ధారాదత్తం చేశారని ఆక్షేపించారు వైకాపాలో రాజ్యసభకు అర్హులైన నాయకులు లేనందునే తెలంగాణ నుంచి తెచ్చుకున్నారని విమర్శించారు. బటన్‌ నొక్కి నిధులు విడుదల చేస్తున్నామని చెబుతున్న జగన్‌.. ఆ పథకాలు ఇప్పుడు ఏ స్థాయిలో ఉన్నాయో సర్వే చేయించుకోవాలని సూచించారు. 2024 ఎన్నికల్లో జగన్‌కు బుద్ధి చెప్పేందుకు ప్రజలు సిద్ధంగా ఉన్నారని శివారెడ్డి అన్నారు.